Statim fui in spiritu: et ecce thronus positus erat in caelo; et supra thronum sedens.
Et in circuitu throni, viginti quattuor thronos, et super thronos viginti quattuor seniores sedentes, circumamictos vestimentis albis, et super capita eorum coronas aureas.
Et de throno procedunt fulgura et voces et tonitrua; et septem lampades ignis ardentes ante thronum, quae sunt septem spiritus Dei; et in conspectu throni tamquam mare vitreum simile crystallo. Et in medio throni et in circuitu throni quattuor animalia, plena oculis ante et retro: et animal primum simile leoni, et secundum animal simile vitulo, et tertium animal habens faciem quasi hominis, et quartum animal simile aquilae volanti.
Et quattuor animalia singula eorum habebant alas senas, in circuitu et intus plenae sunt oculis; et requiem non habent die et nocte dicentia:
" Sanctus, sanctus, sanctus Dominus,
Deus omnipotens,
qui erat et qui est et qui venturus est! ".
Et cum darent illa animalia gloriam et honorem et gratiarum actionem sedenti super thronum, viventi in saecula saeculorum, procidebant viginti quattuor seniores ante sedentem in throno et adorabant viventem in saecula saeculorum et mittebant coronas suas ante thronum dicentes:
" Dignus es, Domine et Deus noster,
accipere gloriam et honorem et virtutem,
quia tu creasti omnia,
et propter voluntatem tuam erant et creata sunt ".
Et vidi in dextera sedentis super thronum librum scriptum intus et foris, signatum sigillis septem.
Et vidi angelum fortem praedicantem voce magna:
" Quis est dignus aperire librum et solvere signacula eius? ".
Et nemo poterat in caelo neque in terra neque subtus terram aperire librum neque respicere illum.
Et ego flebam multum, quoniam nemo dignus inventus est aperire librum nec respicere eum.
Et unus de senioribus dicit mihi:
" Ne fleveris; ecce vicit leo de tribu Iudae, radix David, aperire librum et septem signacula eius ".
Et vidi in medio throni et quattuor animalium et in medio seniorum Agnum stantem tamquam occisum, habentem cornua septem et oculos septem, qui sunt septem spiritus Dei missi in omnem terram.
Et venit et accepit de dextera sedentis in throno.
Et cum accepisset librum, quattuor animalia et viginti quattuor seniores ceciderunt coram Agno, habentes singuli citharas et phialas aureas plenas incensorum, quae sunt orationes sanctorum.
Et cantant novum canticum dicentes:
" Dignus es accipere librum et aperire signacula eius,
quoniam occisus es et redemisti Deo in sanguine tuo ex omni tribu et lingua et populo et natione;
et fecisti eos Deo nostro regnum et sacerdotes, et regnabunt super terram ".
Et vidi et audivi vocem angelorum multorum in circuitu throni et animalium et seniorum, et erat numerus eorum myriades myriadum et milia milium, dicentium voce magna:
" Dignus est Agnus, qui occisus est, accipere virtutem et divitias et sapientiam et fortitudinem et honorem et gloriam et benedictionem ".
Et omnem creaturam, quae in caelo est et super terram et sub terra et super mare et quae in eis omnia, audivi dicentes:
"Sedenti super thronum et Agno benedictio et honor et gloria et potestas in saecula saeculorum".
Et quattuor animalia dicebant:
" Amen ";
et seniores ceciderunt et adoraverunt.
